રાજકોટઃ દુષ્કર્મ પીડિતાએ 45 દિવસ પહેલા આપ્યો બાળકીને જન્મ, સારવાર દરમિયાન બાળકીનું મોત

પિતાની છત્રછાયા ગુમાવનાર 14 વર્ષની સગીરાને તેની બહેનના જ જેઠે ભાઈને મારી નાખવાની ધમકી આપી હવસનો શિકાર બનાવી ગર્ભવતી બનાવી

રાજકોટઃ બહેનના જેઠે સગીરાને ઉપર દુષ્કર્મ બાદ 45 દિવસ પહેલા બાળકીને જન્મ આપ્યો હતો. જોકે, આ બાળકીનું સારવાર દરમિયાન મોત નીપજ્યું છે.  રાજકોટ આજીડેમ પોલીસ સ્ટેશન વિસ્તારમાં આવેલ સરગામે રહેતી પિતાની છત્રછાયા ગુમાવનાર 14 વર્ષની સગીરાને તેની બહેનના જ જેઠે ભાઈને મારી નાખવાની ધમકી આપી હવસનો શિકાર બનાવી ગર્ભવતી બનાવી દેતા તેણીએ 45 દિવસ પહેલા બાળકીને જન્મ આપ્યો હતો.  

ઉલ્લેખનીય છે કે દુષ્કર્મનો આરોપી નારણ તલાવડીયા હાલ જેલમાં પોક્સોના ગુના હેઠળ સજા કાપી રહ્યો છે. હાલ પોલીસે બાળકીના મૃતદેહનું પોસ્ટમોર્ટમ કરાવી કાયદેસરની કાર્યવાહી હાથ ધરી છે.આજથી બે માસ પૂર્વે પિતાની છત્રછાયા ગુમાવનાર સગીરા ઉપર થયેલા દુષ્કર્મ અંગેની જાણ તેના પિતાની લૌકિક ક્રિયા વખતે થતા પરિવાર ઉપર આભ તૂટી પડ્યું હતું અને આ અંગે આજીડેમ પોલીસ મથકમાં ફરીયાદ નોંધાવતા આ મામલે આજીડેમ પોલીસે પોક્સો એક્ટ હેઠળ ગુનો નોંધી કોળી શખ્સની ધરપકડ કરી હતી.

પ્રાપ્ત વિગત મુજબ રાજકોટ જીલ્લાના કોટડાસાંગાણી ગામે માવતરના ઘરે રહેતી 33 વર્ષીય કોળી મહિલાએ 13 ઓક્ટોબરના રોજ આજીડેમ પોલીસ મથકમાં નોંધાવેલી ફરીયાદમાં આરોપી તરીકે રાજકોટના સરધાર ગામ પાસે આવેલ સર ગામે રહેતા નારણ ચીનુભાઈ તલાવડીયાનું નામ આપ્યું હતું જેને તેની 14 વર્ષની સગીર પુત્રી ઉપર દુષ્કર્મ ગુજાર્યું હોવાનું જણાવ્યું હતું.

ફરિયાદી મહિલાને સંતાનમાં બે પુત્રો અને બે પુત્રી થયા હતા જેમાં પુત્રીમાં એક 18 વર્ષ અને બીજી નાની 14 વર્ષની છે જયારે પુત્રમાં મોટો 12 વર્ષ અને નાનો 8 વર્ષનો છે. મોટી પુત્રીના લગ્ન સર ગામે થયા છે. મહિલાના પતિનું આજથી બે માસ પૂર્વે હૃદયરોગના હુમલાથી અવસાન થયું હતું ત્યારબાદ મહિલા પોતના માવતરના ઘરે બલધોઈ ગામે આવી ગઈ હતી. પતિના અવસાન બાદ લૌકિક ક્રિયા વખતે 14 વર્ષની નાની પુત્રીનું પેટ વધી ગયું હોય પરિવારજનોએ શંકા વ્યક્ત કરી હતી જેથી પુત્રી સાથે કશુક અજુગતું બન્યાની શંકાએ તેની પુછપરછ કરતા માતાના પગ નીચેથી જમીન સરકી ગઈ હતી.

14 વર્ષની નાની પુત્રીએ માતાને આપવીતી જણાવી હતી. જેમાં તેની ઉપર બનેવીના મોટાભાઈએ દુષ્કર્મ ગુજાર્યું હોવની વાત કરતા પરિવારજનો ચોકી ગયા હતા. પુછપરછમાં જાણવા મળતી માહિતી મુજબ છ માસ પૂર્વે દંપતીને સગાઇના કામસર નજીકના ગામે જવાનું થયું ત્યારે 14 વર્ષની નાની પુત્રી અને 8 વર્ષના નાના પુત્રને મોટી પુત્રીના સાસરે મૂકી ગયા હતા ત્યારે મોટી પુત્રીના જેઠ સર ગામે રહેતા નારણ ચીનુભાઈ તલાવડીયાએ 14 વર્ષની સગીરાના ભાઈની હત્યા કરી નાખવાની ધમકી આપી તેની સાથે દુષ્કર્મ ગુજાર્યું હતું.

સગીરા અને તેનો ભાઈ બહેનના ઘરે એકલા હતા ત્યારે નારણ ચીનુભાઈ તલાવડીયાએ સગીરાના ભાઈને મોબાઈલ આપી ઘરની બહાર રમાવા મોકલી દીધો હતો જયારે નાનોભાઈ અને તેની પત્ની ઘરે હાજર ન હતા તેમજ નારણ ચીનુભાઈ તલાવડીયાની માતા ઢોર ચરાવવા ગયા હતા ત્યારે સગીરાની એકલતાનો લાભ લઇ ફરિયાદી મહિલાની મોટી પુત્રીના જેઠે દુષ્કર્મ ગુજારી નાની દીકરીને ગર્ભવતી બનાવી દીધી હતી.