વડાપ્રધાન મોદીના નામે વધુ એક આંતરરાષ્ટ્રીય સન્માન, ભૂટાન સર્વોચ્ચ નાગરિક પુરસ્કાર એનાયત કરશે

આ પહેલા ઘણા દેશો વડાપ્રધાન મોદીને તેમના સર્વોચ્ચ નાગરિક સન્માનથી સન્માનિત કરી ચૂક્યા છે

નવી દિલ્હી : વડાપ્રધાન નરેન્દ્ર મોદીના નામમાં વધુ એક આંતરરાષ્ટ્રીય નાગરિક સન્માન ઉમેરાયું છે. પાડોશી દેશ ભૂટાન વડાપ્રધાન મોદીને તેના સર્વોચ્ચ નાગરિક પુરસ્કારથી સન્માનિત કરશે. ભૂટાન દ્વારા તેની જાહેરાત કરવામાં આવી છે. ભૂટાને ભારતના વડા પ્રધાન નરેન્દ્ર મોદીને તેના સર્વોચ્ચ નાગરિક પુરસ્કાર Ngadag Pel Gi Khorloની જાહેરાત કરી છે. આ પહેલા ઘણા દેશો વડાપ્રધાન મોદીને તેમના સર્વોચ્ચ નાગરિક સન્માનથી સન્માનિત કરી ચૂક્યા છે.

PMO ભૂટાને PM મોદીની ભૂટાન મુલાકાતની તસવીર પણ શેર કરી છે. ઉપરાંત, ભૂટાનના વડાપ્રધાન કાર્યાલય વતી, કહેવામાં આવ્યું હતું કે, 'અમે PM મોદીને ભૂટાનના સર્વોચ્ચ નાગરિક સન્માનથી સન્માનિત કરવાના નિર્ણયથી ખૂબ જ ખુશ છીએ. ભારતના વડાપ્રધાન નરેન્દ્ર મોદીએ કોરોના રોગચાળા દરમિયાન અને પાછલા વર્ષોમાં ભૂટાનને જે સહકાર અને સમર્થન આપ્યું છે તે બેજોડ છે. તમે આ સન્માનને પાત્ર છો. ભૂટાનના લોકો તરફથી તમને ખૂબ ખૂબ અભિનંદન.

તમને જણાવી દઈએ કે, આ પહેલા સાઉદી અરેબિયા, અફઘાનિસ્તાન, પેલેસ્ટાઈન, સંયુક્ત આરબ અમીરાત, રશિયા અને માલદીવ વડાપ્રધાન નરેન્દ્ર મોદીને તેમના સર્વોચ્ચ નાગરિક સન્માનથી સન્માનિત કરી ચૂક્યા છે.